港男港女

其實都是講了很多年的話題啦, 我沒有看星期日檔案, 內容應該也都是老掉了牙的經典例子. 今早上班時在 am730 看到的, 超好笑, 回到公司立即和兄弟姊妹們分享. 其實我也很不喜歡到旺角, 人太多, 也過了到潮流特區購物的年紀.

***

港男達人: 七分鐘的約會

香港地係一群「港女」嘅天下。佢地唔理高矮肥瘦，一律扮晒高檔，其實就壓迫用血汗、勞力、尊嚴換取愛情嘅「港男」！港男無罪，MK有理！

小弟叫阿達，鍾意砌高達(Gundam)，所以花名叫達人。今年28歲，中七考唔上大學之後，三年轉兩次工，家陣份糧擒七打八，單身但係草根，收入長期糧尾，做人對事有今生無來世，講嘢一句到尾，唔啱聽可以轉台，無興趣顧人感受。

但係點都好，一個少男總會有需要，係拍拖嘅需要……約會係咁樣開始，唔係……應該話係咁樣結束：星期六，我終於約到剛喺MSN識嘅Jenny出街，等咗一陣佢就出現，我明知佢喺斜對面望一輪至過嚟，都唔玩踢爆，因為佢真係有少少似有線嗰位靚女主播Carman，不過打扮就型啲，無咁老餅，兩秒鐘就決定收貨。「想去邊度玩？不如去新世紀睇戲呀？」我主動提出。「我從來都唔喺MK睇戲行街噃！不如陣間去PP或者IFC睇吓？」她口吻寸得嚟又好自然。

不過我都唔明啲中環港女點解一定要講英文仲要迫你明白佢講緊去邊度，同埋寧願搭車又俾多啲錢去買一啲旺角都有嘅嘢，但係話晒咁辛苦約咗出嚟，人又幾索，咪「咕」聲忍住佢先。「你鍾意啦……」「其實……MK真係好cheap囉！人又雜，地方又迫，仲有啲人一個二個都好MK look囉！」她邊行邊嘟起咀投訴。「旺角有乜嘢地方唔妥先？」我一輪咀反寸呢件自稱在中環返工的物體：「旺角有教協有信和有星際有開益有譚魚頭，食乜買乜諗到都有，仲有港鐵隧巴，夜咗通宵小巴過海，幾好呀！」「吓……？」Jenny一時呆咗俾唔到反應。

我自小喺西洋菜街長大，父母喺煙廠街的一個菜檔養大我三兄弟妹，洗衣街潮州公學校長俾我留班兩次，奶路臣街旺電三樓個老細請我做第一份暑期工，學特首口吻：我飲嘅係MK水，流嘅係MK血。「旺角cheap？！」我真係火都嚟。

「你意思即係話我阿爸阿媽同埋我細佬妹日日都好cheap啦？對唔住！我接受唔到，拜拜！」我擰轉面就行，無理到佢當時表情，我知道咁做好樣衰，但係身為MK男，誓死捍衛MK價值，我認為在金融海嘯下，喺中環白領一族光環消失嘅年代，MK這種街頭草根港式文化，至係香港真正嘅核心價值。

source am730